Тергөөчү:
– Сен асыл буюмду уурдап атканда аягы эмне болот деп кабатырланган жоксуңбу?

Ууру:
– Чынын айтсам, тергөөчү мырза, алып атканымда ушул буюм жасалма болуп калбаса экен деп, абдан кабатыр болгом…

* * *
Милийса:
– Эмне үчүн шакекти таап алган соң бизге кабарлаган жоксуң?

Шектүү кылмышкер:
– Анткени шакекте «Мен түбөлүккө сеникимин!» деген жазуу оюлуп жазылып туруптур…

* * *
– Ым-м, жүрөктүн кагуусу жайында экен…

– Доктор, сол колумдун тамырын кармап көрүңүзчү, оң колум протез!

* * *
Тергөөчү:
– Эмне үчүн бул машинаны уурдагың келди?

Ууру:
– Анткени машина мүрзөнүн жанында туруптур, мунун ээси небак өлгөн экен деп ойлогом.

* * *
Том өзүнүн эшегин чөп жебеске көндүрүү үчүн күн сайын чөптү аз-аздан бере баштайт. Акыры эшеги ачкалыктан өлүп калганда:

– Кап, жаңыдан чөп жебеске көнүп келатканда өлүп калбадыбы, өкүнүчтүү, – дептир.

* * *
Мунай магнаты Парижге аялы менен келип, Эйфел мунарасынын түбүндө туруп:

– Мындан жыйырма жыл мурда келгенимде да мунара ушундай эле турган. Өкүнүчтүүсү, ошондон бери бир галлон да мунай берелек, – дептир аялына.

* * *
Сот:
– Соттун чечими боюнча сен айыпсыз экенсиң. Эки аялы бар дегени чындыкка жатпады. Эми кете берсең болот, – дейт.

Соттолуучу:
– Ракмат, судья мырза. Бирок тынчыраак жашоо үчүн кайсынысынын үйүнө барганым оң? – деп кеңеш сураган экен.

* * *
Атасы:
– Э-э, кызым, эмнеге эртерээк турмушка чыкпайсың?

Кызы:
– Жыйырмадай жигиттин бир да бирин жактырганым жок. Дагы күтө түшөм, көңүлүмдөгү табылышы мүмкүн да…

Атасы:
– Убакытты өткөрө бербе…

Кызы:
– Кабатыр болбоңуз, ата, деңизде толгон балык бар, алардын ичинен бирөө сөзсүз кайырмакка илинет.

Атасы:
– Бирок кайырмак учуна илинген чырганын даамы убакыт өткөн сайын кете баштайт да!

* * *
Билл жаңы батиңке сатып алат да үйүнө коюп коёт.

Аялы:
– Билл, жаңы батиңкеңди эмнеге кийбей жүрөсүң? – дейт.

– Мен аны эртең кием. Анткени сатуучу бир жумадан кийин бутуңду кыспай калат деген, – деген экен Билл.

* * *
Рождестводо аялы менен коңшусуна конокко келишет. Күйөөсүнүн көбүрөк ичеринен кооптонгон аялы:

– Билл, байкап ич, – деп шыбырайт.

– Эмнеге? – дейт Билл, – арак тигилердики да…

– Арак тигилердики болгон менен ашказан сеники да… – дептир аялы.

* * *
Юанюан аттуу балдар бакчасында Жинжин бир досу менен аквариумдагы алтын балыкты карап турушат.

– Балык эмне үчүн унчукпайт, билесиңби?

– Билбейм.

– Ошону да билбейсиң, эгер сенин башыңды сууга тыгып койсо унчукканыңды көрөр элем…

– дептир Жинжин.

* * *
Физиология окутуучусу:

– Кайсы тиш эң акыркы жолу чыгат? – деп сурайт балдардан.

Бир окуучу:

– Кийме тиш, – деген экен.

* * *
Жолдон өтүп бараткан адам:

– Эй, бала, эмне ыйлап атасың?

– Тыйынымды жоготуп алдым.

– Ыйлаба, ме, тыйын.

Тыйынды алган бала дагы ыйлай баштайт.

– Дагы эмнеге ыйлап атасың, тыйының колуңда турбайбы?

– Эгер тыйынымды жоготпогондо, менде эки тыйын болмок да…

* * *
Үйбүлө күтүүнүн эрежеси жаңы жубайлардын дубалына илинип турат:

  1. «Аялдыкы дайыма туура».
  2. «Эгер аялдыкы ката болсо, үйбүлө күтүү эрежесинин биринчи беренесин караңыз».

* * *
Экскурсовод музейдеги нерселерди тааныштырып атты:

– Мына береки ташка айланган буюмга эки миллион тогуз жыл болгон, – деди.

– Айтыңызчы, бул буюмдун жашын кантип так айтып атасыз? – деп сурады туристтердин бири.

– Жөнөкөй эле, – деди экскурсовод, – мен ушул музейге жаңыдан ишке орношконумда бул буюмга эки миллион жыл өткөн экен. Ал эми менин иштегениме туптуура тогуз жыл болду.

Кытай тилинен которгон Аман САСПАЕВ

Добавить комментарий

Ваш e-mail не будет опубликован. Обязательные поля помечены *