Антуан де РИВАРОЛЬ
(1757-1801), француз жазуучусу

Адамдар башында бири-бирине канчалык сылык-сыпаа жакындашса, кийин ошончолук жек көрүшкөнгө чейин жетет.

* * *

Даанышман өз акылына, кудай деген кулпенде көрүнгөндүн былжыраган кебине ишенет.

* * *

Өкмөт эл ишенимин актаган учурлар тарыхта чанда болгон.

* * *

Вольтер: «Адам канчалык илим-билимдүү болсо, ал өзүн ошончолук эркин сезет» десе, анын шакирттери: «Өзүңдү канчалык эркин сезсең, ошончолук илим-билимдүү болосуң» деген үчүн акылыбыз айраң.

* * *

Жакшы элден жакшы армия куралат. Эртеби-кечпи, андай өлкө армиясына көзкаранды болот.

* * *

Куу кишилер куулугунан куурагандай, өкүмдарлык өкүмдарлыгынан кыйрайт.

* * *

Ойношумдун акылы роза гүлдүн чанагынчалык эле болчу.

* * *

Жаратылыштын төрт калдайган декорациясы бар, алар: Жаз, Жай, Күз, Кыш. Эч алмашпай кирип-чыккан түбөлүк актерлору – Ай менен Күн. А биз көрүүчүлөрбүз. Анткен менен көшөгө артына алар эмес, биз жөнөйбүз.

 

 

chesterfild

Филип ЧЕСТЕРФИЛД
(1694-1773), англис дипломаты, жазуучу
 

«Меники туура» дей бербей, башкалар туура эмес экенин кашкайта далилде, анан канаттанасың.

* * *

Саясат менен соодада эч качан ишеничтен чыкпа. Экөөндө тең кайта-кайта алдай берүү мүмкүн эмес.

* * *

Өз партиясына эмес, өзүнө таянган министрди эл баалайт.

* * *

Мактоого ийибеген аялдан өткөн иреңи суук аял болбойт.

* * *

Башкалардан акылдуу бол, бирок аныңды башкаларга туйдурба.

* * *

Өзү жөнүндө эч нерсе айтпагандарга же өзү жөнүндө көрүнгөнгө айта бергендерге эч ким сырын айтпайт.

* * *

Дин, үйбүлө маселесине келгенде эч кимге кеңеш айтпайм. Себеби, кимдир бирөө менин кеңешим үчүн тигил же бул дүйнөдө азап тартышын каалабайм.

Кыргызчалаган О.ШАКИР

Добавить комментарий

Ваш e-mail не будет опубликован. Обязательные поля помечены *