1-кат

Кандай дос? Иштер ийгиликтүү өтүп атабы? Ден-соолуктар чыңбы? Үйдөгүлөрдүн баары жакшы жатышабы?

Эми мени сурасаң, баягыда 10-август күнү 2-автобус менен кеткем. 26-август күнү кайра келдим. Мына бүгүн 31-август. Ишке орноштум, бут үзүлгөнчө жүгүрүп жүрүп. Иш «Ленин жолу» газетасында. Должность зам. нач. областного литературного отдела.

Эми бир аз лирикалык чегинүү жасабаса болбойт. Баягыда мага капа болгон жоксуңбу? Бара деле берет элем үйүңөргө, бирок ошол күнү эмнегедир настроение жок эле. Сен ага капа болбо. Менин анча-мынча кыялымды түшүнөсүң го.

Бүгүн институтта жүрүп, Бейшегүлгө учурап, андан адресиңди алдым. Силер эртеси 11-күнү учуп кеткен экенсиңер. Эми жаңылыктардан сурасаң. Паспортту Токтогулдан барып алып келдим. 18-август күнү автобус менен Өзгөрүшкө кетейин деп атсам, Нестан ошол автобуска түшүп алыптыр. Балдар менен жүздөшө коем деп, ал автобустан калып, Нестан менен сүйлөшө албай калдым. Эми жолуга элекмин.

Анан да жалгызсырайт экенсиң. Бүгүн кичине бир-эки бутылка пиво ичтим эле, баягы өткөргөн күндөрдү эстеп шолоктогум келди.

Атасынын гөрү. Институтту бүтпөй кое турганда деле болмок экен. Квартирада жалгыз өзүм жашап жатам. Баягы Рахман жашаган үйдөн эки үй жогору. Кыскасы, ошол жерге келсең табасың.

Кыздарга анчалык деле табит жок. Айылдан онду бүткөн бир карындаш келип калган экен. Үч-төрт күн киного алпарып алып жүрдүм. Аялдыкка алса да болчудай неме экен. Шаарга эле иштей бер деп алып калдым. Бирок Нестанга үйлөнөм го чамасы. Элде мурун баш аягымды бир жыйып алайынчы.

Ай атаң гөрү десе, баягы күндөр бир кайталанып келер болсочу. Ушул кат жетээри менен тезирээк кат жазып же переговор берип сүйлөшөлү. Үндөрүбүздү угуп болсо да кичине сагынычты таратып алалы. Кандай дейсиң я Балта…

Группалаштардын ичинен биринчи катты сага жазып атам. Экинчиси апайлык Том Портерге кетмекчи. Бүгүн түнү таң атканча кат жазып чыгам го. Эмесе ушуну менен сөзүмдү бүттүм. Менден Бабайга ж.б…га салам айтып кой.

Дагы бир эскертерим: тезирээк кат жазууну жана переговор берүүнү унутпа. Мен деле берет элем, бирок сен колхоздо экенсиң. Кудай билет келесиңби, келбейсиңби.

Мобул ырларды окуп, мобу барбайган сүрөттү көрүп кой.

Колуңду кысып, кучактап Карбалас.

31-август, 1979-жыл.

Менин адресим: г.Ош, переулок Светлый 20. Бакирову К. Библиотекада отуруп бир кат жазчы

 

2-кат

«Жаттайм жазган каттарыңды ырлардай»

Кандай дос? Ден-соолуктар чың, иштериңде кыйынчылыктар жокпу? Жазган катыңды алдым. Ырахмат! Катыңдын кандай гана деми күчтүү! Күнүгө бир-эки маал окуп коём, төш чөнтөгүмө салып алгам.

Кечээ 18-сентябрь күнү Нестанга бардым. Катты ага да окуттум. Гулбара, Гуля, Мавлюдалар салам айтты. Аларга случайно учурап калдым. Кыскасы, өзүң айткандай, арман көп-ов!!! Азыр обллиттин редактору болуп иштеп атам. Так что, кабарчы болбой калдык. Иштер жакшы. Суббота, воскресение күндөрү эс алабыз. Калган беш күн кечки саат алтыга чейин закондуу түрдө кабинеттебиз. Телефон № 2-49-00. Шаарга келип калсаң түз эле звонит эте бересиң.

11-бекен же 12-сентябрдабы, Рахман Турганович келип кетти. Кабинетте отурсам эле мормоюп кирип келсе болобу. «Ак буудайдын нанындай жуурулушуп калышты» — деп «Манаста» айткандай, эзилишип эле калдык. Ал күнү портфелин бекитип коюп, алып калдым. Кетемин деп эле болбойт көшөрүп. Өзүң айткандай тост көтөрүп, сени эскердик. Баягы сени таш менен коймокчу болгонун айтсам, баланын оозундагы арак стаканы менен кошо ыргып кетсе болобу. Деле мормоюп сөгүнүп коет. «Жүрөгүм ооруп, ичим өтүп атат», — деп айтты эле деп сөздөрүңдү жаттап калыптыр.

Кыскасы, өткөндөрдү эстеп, накта жашыганга чейин бардык. Бирок эмне кыласың, аларды кайра кайрылбагандан кийин. Ушундай досум! Ырларды болсо жазып атам. Алдын жетишинче. Эмки максат ошо болуп калды. Же чыгуу, же калемди ыргытып, жөнөкөй оокат кылуу. Баса, Урум, Гүлсайра, Кабира, Камыт, Сапияларга жолуктум. Баардыгы мугалим болуп иштеп жатышат.

Эми Оштогу жаңылыктардан айтсам: бүгүн 19-сентябрь, эртең Терешкова күйөөсү менен Гагариндин эки кызы, шахматист Карпов келет экен деп даярданып жатышат.

Досторду сагынуу болсо аз-аздан тарап бараткандай. Кичине баш көтөрүп, тагдырга таң берип деп коюшубу? Ошентип жүрөм мен болсо. Бирок досум! Сени өмүр бою сагынам го. Эч кандай эмоцияга жеңдирбей туруп ушуну менен сөзүм бүттү. Үйдөгүлөргө жана башка тааныштарга менден салам айтып кой. Өзүң айткандай, айрыкча Бабайга!

Катыңды ак ырга айлантам деген 1-аракет, окуп кой ирээнжибей:

ДОСУМДУН КАТЫ
Жан досум.
Жакшысыңбы?
Чың бекен ден-соолугуң?
Окудум ырларыңды газетадан,
Өскөнүн байкадым ойлоруңдун.
Ээ Каке арман көп да,
Өрттөнүп, студенттик күндү эстедим.
Өөп кой татынакай Нестаныңды,
Бири эле гүлдестенин.
Анан да бабай сага салам айтты,

А досум айта берсек жаңылык көп.
Үйлөнүп калам балким,
Кысташат үйдөгүлөр катын ал деп.

Кош эми көрүшкөнчө, саламат бол!
Турмушта тоолор гана кезигишпейт.
Бул каттын жообун күтөм…
10-сентябрь, Керимов!

«Ленин жолу» газетасына чыккан ушул ырларды окуп, биз ыр окуган кечелерди дагы бир жолу эскерип кой. Портвейнден 100 грамм көтөрүп туруп. (тамаша дос)

Менин адресим г. Ош, обллит. Бакиров К. Колуңду кысып, табактай бетиңди өөп. 19/IX 79. Жообун күтөм.

 

3-кат

Саламатсыңбы дос! Кандай ден-соолуктар жакшыбы, иштериңде кыйынчылыктар жокпу? Баягыда кат жаздым эле конвертке салынбай, үйдө 15 күндөй туруп калды. Менин илендилигимди өзүң билесиң го. Жакында Нестанга, Мавлюда, Гулнарага жолуктум. Нестан экөөбүз сен жөнүндө сүйлөштүк. Сенин досторуңдун эң жакшысы Дүйшөн дейт. Баягы жазган катыңды окуттум. Таң атканча экөөбүздүн жасаган иштерибизди эч бурмалабай туруп айтып бердим. Анан Гуля ушунчалык муңайым болуп калыптыр. Ыйлагым келди просто. Эмнегедир менден уялгандай, кор болуп калгандай, тике карай албайт. Атаң гөрү, көрсө өзүңдү эси ооп сүйгөн экен! (кроме шутки). Дүйшөн сага салам айтты, переговор менен сүйлөштүм десем. Эмне мага кат жазса болбойт бекен деп жалооруйт. Адреси баягыдай эле. 16-комната. Ушундай ДОС.

Нурлан болсо педучилищада мугалим, 1-2-курстарга кыргыз тилден, адабияттан берет. 28-сентябрь күнү пахтага кетишти. Мен Нестанга 15-октябрда барам го. Анан досум ырларыңан жөнөт.

Баягы каттагы ырыңды эмки адабият бетине кетиребиз. Абдан жакшы ыр экен. Жаттап алып, окуп жүрөм. Нестанга да окуп бергем. Кыскасы досум, турмуш жакшы. Жакында общежитье алам, пока квартирадамын. Бирок баягы жерден башка.

Саламым менен Карбалас!!!

Менин адресим г.Ош ул. Ленина 209 обллит. Бакирову К. Бул менин иштеген жерим. Катты ушул адрес боюнча жаза бер.

 

4-кат

Саламатсыңбы Дүйшөн дос! Эмнеси болсо да кат жазууга туура келди. Ал жалаң эле сени эмес, бизди да кейитти. Мен 8-ноябрь күнү Турдумамат агайга жолуктум эле. Агай ал кишини областной больницада жатат деп айткан. Мен 10-ноябрь күнү кечкурун барсам, ошондой иш болуптур. Эми эмне кылабыз, башыңды көтөр дос! Башкаларды көп кейитпе! Былтыр эле кадимкидей жүрбөдү беле? Андай болуп калат деп ким ойлоптур.

Дүйшөн дос! Мен сага акыл же кайрат айткан жокмун, жүрөгүм эмнени сүйлөсө, ошону айтып жатам. Суранарым көп кайгырба, көп ойлонбо! Сен үчүн, эжелер үчүн, ини-карындаштар үчүн оор жоготуу экенин түшүнөм. Бирок айла канча, бул иш кимдин колунан келет? Эр жигит экенибизди да унутпа. Мындай тагдыр ар бир адамдын башында бар. Керек болсо өзүбүз да ошондой болобуз. (Анын бетин нары кылсын дечи) Бирок моюндагы нерсе. Мен барып келейин дедим эле, өзүм менен кошо иштегендер ооруп калып, мен жалгыз дежурить этип, бара албай калдым. Ал үчүн мени кечирип кой, дос! Аксакалдын жаткан жери жайлуу, топурагы торко болсун! Жана дагы айтарым, өзүңдү карма дос! Али биз басуучу жол, аша турган ашуулар алыста. Эжелерге, тууган-туушкандарга менден салам айтып, ини-карындаштарыңды өөп кой.

Кош, көрүшкөнчө, дос! Колуңду кысып, өөп Карбалас.
14/XI — 79-жыл.
г.Ош, ул. Ленина, обллит.

 

5-кат

Кандай Дүйшөн дос! Менин мурдагы жазган катымды алдыңбы? Эми өткөндү көп эле эстей бербе. Турмушта баардыгы болот экен, жаман да, жакшы да. Эң башкысы — биз аларга жеңилбейли.

Батып кетсин таш ичине тешиксиз,
Көздөр үчүн кан аралаш жаш жууган.
Биз өлүмгө  тик карайлы дөө болуп,
Чагылгандын үнү менен каткырган!

Бүгүн профсоюздук чогулуш болуп горкомго кеттим эле. Сен звонит этиптирсиң. Жок болуп калгандыгым үчүн кечирип кой.

Кайра-кайра эле өткөндөн козгошо бербейли дос. Сен дагы көп ойлонуп, көп кайгырба. Мүмкүн болушунча кашкайып күлүп жүрүүгө (душман көзүнө) аракеттен. Андай кылуу сенин колуңдан келет. Менин айтарым ушул ДОС, келбей койду деп капа болбо. Кечээ күнү Нурлан пахтадан келиптир (Ал пед.уч-да мугалим). Ал экөөбүз жогорку үйгө барып келели дедик эле. Ал жактан эжелер келе элек экен. Эми тез-тез кат жазып тур. Анан сага арнаган ушул ырды окуп кой. Саламым  менен! Кучакка бек кысып Карбалас.  г.Ош, ул. Ленина 209, обллит.

20/Х1-79-жыл.

(Дүйшөн Керимовго)
Жан досум катыңды алдым,
Сурапсың ал жайымды.
Достордун, туугандардын эсендигин,
Үйлөндүмбү, үйлөнө элекминби.
Азыраак сөз кылыпсың:
Нурланды,
Рахманды,
Жумабайды,
Дилбарды, мен бир кезде ашык болгон.
Бардыгын эскерипсиң.
Филфакта бизди окуткан агайларды,
Биринчи курстан эми гана өткөн
Бир сулууну,
Поэзия кечесин,
Күпүлдөп ыр окуган жаш акындар,
Атырылып чыгышып трибунага!
Арманың ат башындай,
Студенттик жылдарды эстеп,
Түтөптүр каңырыгың.
Айтыпсың такыр арга калбаганын:
Жакында болорлугуң күйөө бала.
Кайнаталуу,
Кайненелүү,
Балдыздуу жылдыздай бир…
Катыңдын акырында,
Нарындан жаңылыктар,
Сапсары жалбырактар.
Ава таза,
Ава суук сентябрдан октябрга,
Жакында жөнөйм депсиң,
Биздин Ошко,
Жан досуң Карбаласка.
От болуп төлгүлүпсүң, чачылыпсың,
Сагынчың сыйдыра албай ак баракка,
Жан досум,
Каламын жашка айланып мөлтүрөптүр…
Карбалас Бакиров.
1.10.1979

 

6-кат

Кандай Дүйшөн дос! Ден-соолук чың, иштер ийгиликтүү, үйдөгүлөрдүн баары тынч жатышабы? Аяш жакшы жүрөбү?

Эми мени сурасаң, баары жакшы. Силерди эле сагынганым болбосо, калган нерсе өтө берет турбайбы? Жумабайдан, Рахмандан кат алып турам. Жаңы жылда келишти эле. Тынычтардын үйүндө болдук. Нестан да биз менен болду. Анан дагы бир жаңылык — Нурлан кыздуу болду.

Ойда жуудук училищага барып. Сени жана башка досторду эскердик. Ибраим баягыда келип кетти эле, мен адресиңди бергем. Кат жаза элекпи? Быйыл 24-мартта жолукмак эмес белек, эсиңден чыгара элексиңби? Досум ошондо сөзсүз кел. Кыян жүрүп кетсе дагы келип кет. Убакытты эптеп табарсың. Мен кат жазып эле баардыгын кабардар кылып жатам. Кокус сен келбей калсаң, калганы бир тыйынга арзыбай калат дос. Алибетте мен жана биздин достор үчүн. Жанылыктардан билгиң келсе, Ошко жаз келейин деп калды.

Кечээ училищага бардым эле достор — Гулбара, Мавлюда, Гулялар салам айтты. Анын ичинде, алибетте Нестан да бар. Нурлан экөөбүз ошолордун бөлмөсүндө отуруп чакан поэзия кечесин уюштурдук. Нурланды билет чыгарсың, ал азыр ийримдин жетекчиси. Анча-мынча мага акыл айтып калат. Токтолбойсуңбу жигитче деп. Чыгармачылык болсо ак ыр жамаатында көбүрөөк болуп жатат. Традицияга да кээде кайрыла калып жатам. Менде жанылык ушул – дос.

Эми менден үйдөгүлөргө, аяшка салам айт. Өөп койсоң да көптүк кылбайт. Анан 24-мартта келесиңби,  ошонун жообун ачык жаз.

Сыга кучактап досуң Карбалас
11.02.80
Нестан келесоонун катын алган жоксуңбу? Эй досум, келип кетсең көп иштер бар. Өтө көп…

 

7-кат

Кандай Дүйшөн дос!

Ден-соолуктар букадай, иштеген иштериңде кыйынчылык жок, кадимкидей кайраттуу жүрөсүңбү? Бу каяктан чыга калган неме болуп кетти — деп таңкалба. Бу — мен оштук досуң К.Бакиров.

Кандай досум, аяштын ден-соолугу дурус, иштери ийгиликтүү өтүүдөбү, үйдөгүлөрдүн баары аман-эсен жатышабы? Эми мени сурасаң, ал акыбал дурус. Обллитте эки жарым жыл иштеп, жакында общество «Знаниеге» которулдум. Нестан аяшың Гагарин орто мектебинде мугалим эле. Жакында эгиз кыз төрөп, Толукка кетти. Жазга чейин үйүндө болот. Ал эми өзүм болсо жүрөм. Чыгармачылык иштер дурус. «Акын шаар» аттуу токсон ырдан турган ырлар жыйнагымды «Кыргызстан» басмасына тапшырдым. Куда  кааласа 1984-жылга чыгып калыш керек. Андан сырткары «Мектеп» басмасына бир жыйнак тапшырайын деп жүрөм. (Балдар үчүн калптар, жакылмачтардан турган жыйнак).

«Кыргызстан маданияты» газетасына 15 ыр бергемин. Ал ырларга баш сөздү Жолон аке жазып берем деген. Жакында жарыкка чыгып калат го. Андан башка 1982-жылдын май айында өзбек жаш акындарынын Кыргызстандагы күндөрү өтмөк. Ага байланыштуу эки өзбек жаш акындарынын жыйнактарын (чакан) которуп бердим. Ал быйыл альманах болуп чыгыш керек. Бирок Ошто жүрө берген менен болчудай эмес. Фрунзеден иш таап кетип калайын дедим эле, квартирадан кыйналамбы дейм. Телевидениеге сүйлөштүм эле. Түгөлбай Казаковду билесиң го. Мага эки жерден иш таап звонит этти эле, шарт болбой калды. Кээде ушинтип турмушка баш ийип отуруп берген учурлар да болот экен. Но ничево, келечек алдыда. Мендеги жаңылыктар ушул дос. Айтса Жүке, Рахмандарга жолуга элекмин. Бекмамат, Арымбек экөө келип кетти, экөө тең зам. директор экен. Нурлан болсо иштеп жатат. Катташып турган экөөбүз эле. Эми досум мындан ары да тез-тез кат жазып тур. Нестан аяшыңа да кат жазып койсоң болот. Анын адреси:

Токтогул району, с/з «Толук» Турарова Н.
Менин адресим: г.Ош ул. Киргизстана, 409
Общество «Знание»
Бакирову К.
6/II – 82-ж.

Саламым менен кучакка кысып — Карбалас.

Добавить комментарий

Ваш e-mail не будет опубликован. Обязательные поля помечены *